Kilsənin neo-qotika üslubundakı daxili və xarici dizaynı italiyalı memar Paolo Ruceyroya aiddir. 200 nəfərlik kilsənin girişində Məryəm Ananın yerli heykəltaraşlar tərəfindən hazırlamış heykəli qoyulub.


Katoliklik Azərbaycanda orta əsrlərdən yayılmağa başlayıb. XVII-XVIII yüzilliklərdə ölkənin iri şəhərlərində katolik monastrları, missiya və məktəbləri fəaliyyət göstərib. XIX əsrin ikinci yarısı və XX əsrin əvvəllərində - neft bumu dövründə Bakıya çoxlu katoliklər köçüb Azərbaycanda katolik kilsəsinin həyatında yeni mərhələ başlayıb.

Katolik Kilsəsinin Azərbaycandakı Apostol Prefekturası Roma Katolik Kilsəsində yeparxiyaya bərabər ərazi vahididir. “Sui iuris” (“özəl hüquqlu”) statusuna malikdir və fəaliyyətini yeparxiya hüquqlarına, səlahiyyətlərinə əsaslanaraq həyata keçirir. Apostol Prefekturasının rəhbəri (ordinarisi) təyin edildiyi andan Apostol prefekti adlandırılır.


Bu barədə məlumatı bizə Azərbaycan Respublikası Katolik Kilsəsinin Apostol Prefekturası Dini Qurumunun təmsilçisi Yozef Marek verdi. Onunla kilsə haqqında, xristianların inanc əsasları və ibadətləri, Azərbaycanda xristian icmalarının vəziyyəti, dini tolerantlıq və multikulturalizm barədə danışırıq.

- İosif Stalinin dini abidləri sevmədiyi hər kəsə məlumdur,- deyir Yozef Marek.

- Bu, katolik kilsəsinə də təsir edib. Ötən əsrin 30-cu illərin sonunda Bakıda tikilmiş və Məryəm Anaya həsr edilmiş möhtəşəm kilsə bolşevik rejimi tərəfindən dağıdılıb Lakin, Azərbaycan müstəqillik qazandıqdan sonra gözəl günlər başladı. Sovet dövründə katolik kilsəsi olmasa da, katoliklər provaslavların ibadət yerlərinə baş çəkirdilər. Amma bu yetərli deyildi. Çünki ibadət üçün məkan və dini ayinləri icra edə biləcək şəxslər lazımdır.

Roma Papası II İohan Pavel 2002-ci il mayın 23-də Bakıya səfər etmişdi. Səfərin ikinci günündə Papa Bakı İdman Sarayında Müqəddəs Messa ibadəti həyata keçirmişdi. Həmin səfər müddətində Azərbaycan Prezidenti Heydər Əliyev Azərbaycan katolik icmasına Katolik Kilsəsinin tikintisi üçün torpaq sahəsi bağışladı. Bakıda həmin torpaq sahəsində inşa edilmiş Müqəddəs Məryəm katolik kilsəsinin rəsmi açılış mərasimi isə 2008-ci il martın 7-də keçirildi.


22 il öncə Roma Papası II İohan Pavelin Azərbaycanda qarşılandığı günü Yozef Marek belə xatırlayır:
- Təəccübləndim, hətta bir neçə şəxsdən soruşdum ki, belə gözəl qarşılamanın səbəbi nədir? Onlar isə cavabında dedilər: “Axı, o, müqəddəs insandır”. Bu heyrətamizi idi. İnsanlar digər dinin nümayəndəsinə böyük hörmət və rəğbət bəsləyirdilər!


Ötən illər ərzində Azərbaycan öz dini palitrasının zənginliyini qoruyub saxlayıb, hətta artırıb da. Dinə yalnız inanc, mənəviyyat və hüquq məsələsi kimi deyil, həm də dövlətin və cəmiyyətin təhlükəsizliyi və sabitliyi prizmasından yanaşılıb.


“Təəsüf ki, hərdən dini bayraq altında şəxsi maraqlar naminə addımlar atılır. Ürəkdəki kin, nifrət və qəzəb fəsadlara yol açır. Dinindən asılı olmayaraq, insan gərək qəlbilə həqiqəti axtarsın. Dünyanın gözəlliyinə uyğun olmayan, gələcəyimiz, xoşbəxtliyimiz, rahatlığımız və əqidəmizlə tutuşmayan sözlərin əleyhinəyəm. Ürəyimizdə mövcud olan həqiqətlər sözlərlə qarşımızdakı insanlara yol tapmalıdır. Hər insanın qəlbi həqiqəti axtarır, ona susayır. Yalnız həqiqət insanın mənəvi ehtiyaclarını ödəyə bilər. Və yalnız həqiqətin axtarışı ilə insan etiqad etdiyi dini düzgün yaşaya bilər”,- deyir Yozef Marek.


Rahib deyir ki, Bakıda olduğu 20 ərzində Azərbaycan vətəndaşlarında çox müsbət cəhətlər görüb: “Ən çox xoşuma gələn insanın dininə və şəxsiyyətinə qoyulan hörmətdir. Yəni onlar necə olduğunu qəbul edir və hörmətlə yanaşırlar. İnsanlar islam dəyərlərinə əsaslanan ənənəvi mənəviyyatla yanaşı, digər dinlərə və dünyagörüşlərinə də hörmətlə yanaşırlar. Həm katoliklər, həm də digər xristianlar burada sərbəst yaşaya və ibadət edə bilirlər. Azərbaycanda müxtəlif konfessiyaların nümayəndələri sülh şəraitində ömür sürürlər”.


Yozef Marekin sözlərinə görə, Azərbaycanda dinindən asılı olmayaraq, istənilən şəxs cəmiyyətin bir hissəsi olmaq istəyirsənsə, ona heç bir mane yoxdur: “Dünyanın bəzi regionlarında günah, mələklər, Allah və din barədə danışa bilməzsən. Azərbaycan bu mənada istisnadır. İnsanlar hər zaman sənə hörmət edirlər. Bakıda yəhudilər, xristianlar, müsəlmanlar vəhdət içində, dinc və firavan yaşayırlar. Biz digər dinin nümayəndələri ilə rahat şəkildə dialoq qurur, müzakirələr aparır, bir-birimizi anlayırıq”.


Keşiş hesab edir ki, böyük yaradıcılıq potensialı olan dini qurumlar cəmiyyətin möhkəmlənməsinə və destruktiv yalançı dini cərəyanların rədd edilməsinə yardımçı olmalıdır. Əsas olan inanclı insanların sayının üstünlük təşkil etməsidir. Çünki Allah Onun əmrlərini yerinə yetirənləri və həqiqətə sadiq olanları xilas edir.


“Azərbaycanda olmaq və tolerant cəmiyyətlə ünsiyyət qurmaq Tanrının lütfüdür. Mən heç zaman haradasa olmaq üçün Tanrıya dua etməmişəm. Yaradan özü mənə buranı nəsib edib. Allah Azərbaycanı mənim üçün əbədiliyə gedən yol kimi seçib. Özümü Azərbaycanda evimdəki kimi hiss edirəm. Bura mənim evimdir, yaşayış məkanımdır və mən həqiqətən xoşbəxtəm”,- cənab Marek fikirlərini yekunlaşdırıb.


İlkin Nəcəfov
AzVision.az

Qalereya